從 Meta 到抖音:一個香港 Marketer 親述內地 Marketing 的初體驗

當 10 年 Digital Marketing 經驗在內地市場「歸零」

上月回到舊公司，轉戰從未接觸過的 China Marketing。

係香港做 Digital Marketing 超過 10 年，「廣告起手式」都離不開 Meta Ad, Google Ad, Programmatic，「Social Media 」來來去去都係 FB, IG, YT，「Owned Media」都係 eDM, Whatsapp, Apps Push，配合埋 E-shop / CRM 基本上成個 Funnel 都搞掂~

然後，我發覺以上呢D係 China 全部都用唔到...

內地係用什麼抖音，Wechat，大眾點評，小紅書，真係無乜用過，我連揾 3 個朋友開通返個 Wechat 都用咗我成個星期...

流量之王「抖音」：拆解 China Marketing Funnel 的第一步

我用咗一個月時間去了解 China Marketing 套 Funnel 究竟係點，而我第一個接觸的係流量之王「抖音」!

抖音可以話係成個 TOFU 最重要的一環，基本上大部份的流量都係呢度來。

從用家層面看：抖音不只是娛樂

係用家層面，抖音主要係用來睇：

1. Short Video (內地叫短視頻)

2. Livestream (直播)

基本上每個用家一打開抖音就碌短片 (內地叫「刷短視頻」) ，然後亦會夾雜直播係中間，其實就好似 IG Reels 同 YT Shorts 一樣，不過抖音最勁既係，可以直接買埋野。

從 Marketer 層面看：抖音的三大核心操作

係 Marketer 層面，做抖音就大開眼界啦，首先我地將成件事分成：

1. 流量

2. 轉化

3. 核銷 (知道您一定 R 晒頭，我一開始都係咁，之後會講)

1. 流量：建立「帳號矩陣」賺盡自然流量

係抖音要有流量，日更是常識吧，但唔係一個帳號日更內容，而係最少 3 個，最多可以無限個帳號日更，呢個方法叫「帳號矩陣」。

利用不同帳號內容去賺自然流量，姐係你要開 3 個基本帳號：

• 官號 x 1 - 最基本發佈官方內容

• 職人號 x 1 - 以員工角度介紹公司，我見過最好笑係過山車操作員，每日就直播第一身玩過山車視覺

• 垂直號 x 1 - 賣 Sub Product line，例如主題樂園官號賣門票，垂直號賣派對

2. 轉化：透過「直播」將流量變現

抖音最勁既地方，就係可以透過**「直播」**令客人直接落單買野，轉化。

買野? 我個行業好似唔係咁適合wo... 我一開始都係咁諗... 但當我見到 KXC 都可以直播賣雞，賣包的時侯，我就知道乜野都可以賣。

Marketer 想做直播，首先要有個抖音店，放 D 產品上去，然後有個團隊，通常基本為：

• 主播 x 1 (負責不停講，不停 sell)

• 運營 x 1 (Livestream Operation ，負責即時投流 (即落廣告)，解答客人問題，上福利等)

有團隊後基本上可以日日播，每次 3-4 小時，早晚各一次，播 6 休 1。如果是大 Campaign ，通常會來一次「大場直播」，即係連續直播 12 個鐘...

小弟最高紀錄暫時一場大場直播可以做到 RMB 200k+ 成交，但聽過高手一日破 RMB 1M 不是夢，大開眼界。

3. 核銷：成交百萬只是浮雲？被忽略的「核銷率」真相

核乜東東? 以為直播賣完貨，成交就搞掂? 太天真了!

原來抖音客人買完，係可以無條件 Full Refund! 姐係呀客買完一日唔來換貨，公司都無錢收，什麼一晚一百萬成交，都是數字。

所以，係 Marketer 我地要睇埋**「核銷率」**，姐係客人買咗之後，來換領使用，可以理解為 Redemption Rate。

• 一般核銷率： 40-50%

• 實際情況： 姐係您抖音成交為 RMB 10k ，預計到手只有 RMB 5K 係真正的客人消費。而呢個 40-50% 核銷率並唔係必然，有機會得 20-30%，咁實際收入就再減少了!

今日先分享到呢度，好耐無寫過長文，好多謝各位睇到呢度的朋友! 🙏

如果你地鐘意呢類 China Marketing 的分享，歡迎留言/ DM 話我知有咩想知，小弟不定期分享一下學習過程，Thanks again!